Een waarheid en ’n paar brokkies advies

DINSDAG 5 MAART 2024

Jy’s hier.

Doen jou bes om dit die moeite werd te maak.

Probeer om nie te veel skade te doen nie.

Probeer om vertroosting te bied – as jy kan.

Probeer om iemand anders se las te verminder – as jy kan.

Probeer om gesond te bly.

Probeer om sterk te bly.

Kyk uit vir groot en klein deurbrake wat jou kan vat na ’n hoër bestaansvlak toe, of net na ’n beter plek toe.

Wees dankbaar vir die goeie dinge in jou lewe. Wees dankbaar as jy die slegte oorleef het.

En onthou: Ons word nie gebore in dieselfde omstandighede nie, of met dieselfde vermoëns of talente nie. Tog is jou lewe, tot ’n betekenisvolle graad, die resultaat van hoe jy speel met die kaarte wat aan jou gedeel is.

______________________

Wat is jou reisfilosofie?

DONDERDAG 15 FEBRUARIE 2024

Jy word gebore as deel van ander mense se lewensreis.

Teen die tyd wat jy ’n bewussyn ontwikkel van wat aangaan, is jou eie reis reeds ’n geruime tyd aan die gang.

Wat is die punt? Wat is jou doelwit? Hoekom gaan jy voort met die reis? Wat is jou reisfilosofie?

Maak jou reis so pynloos en gelukkig as moontlik. As jy een ander persoon se reis, of etlike ander mense se reise, ook minder pynvol kan maak, gemakliker, en gelukkiger, dan is dit ook goed so – en sal waarskynlik jou eie reis meer die moeite werd maak.

(Terloops, gelukkige 20-jaar herdenking van die eerste keer toe ek hierdie presiese gedagte geformuleer het.)

______________________

Hoe sake staan op Dinsdag 30 Januarie 2024?

DINSDAG 30 JANUARIE 2024

Vir nuwe lesers: Ek is 52 jaar en sewe maande oud. Woon al vir meer as 25 jaar in die suide van Taiwan, vir die laaste 15 jaar of so saam met my vrou, en vir die laaste dekade met twee katte. En so aan en so aan.

Israel en Gaza: As ’n mens waarneem wat Israel aan Gaza en die Palestyne gedoen het sedert 7 Oktober 2023, stel ek myself voor ’n gesprek tussen die Eerste Minister van Israel, Benjamin Netanyahu, en ’n raadgewer:

Netanyahu: “What should our response be to Hamas?”

Raadgewer: “We need to destroy Hamas, even if we destroy the entire territory of Gaza and wipe out every man, woman and child who live there.”

Netanyahu: “Wouldn’t that be considered genocide?”

Raadgewer: “I guess it would.”

Netanyahu: “Let’s go.”

Trump as volgende Amerikaanse president: Wat weet ek van Amerikaanse politiek, en ek is buitengewoon sleg met voorspellings, maar ek dink Trump gaan inderdaad die verkiesing wen in November 2024. Hoekom sal die Diep Staat en hulle duisende medewerkers in die politieke establishment, die media, die akademie, en die vermaaklikheidswêreld dit toelaat? Want Trump sal vir hulle gee wat hulle nodig het. Hy sal ’n stop sit aan die golwe van ongedokumenteerde immigrante wat oor die Amerikaanse grens vloei. Hulle sal hom kritiseer terwyl hy dit doen, ten spyte daarvan dat hulle sal weet hy los ’n probleem op wat húlle veroorsaak het. Hy sal ’n stop sit aan die buitensporighede van die sogenaamde Social Justice Left van die laaste dekade of so. Natuurlik sal hulle lippediens doen aan die ideologie terwyl hy probeer om dit terug in ’n bottel te druk. Hy sal ook ten minste ’n poging aanwend om met Poetin te onderhandel – waarvoor hulle hom ook sal kritiseer, wetende dat almal insluitende hulle troetelprojek Zelenski dit nodig het. Israel is nie ’n probleem nie, want Trump sal voortgaan om Israel te ondersteun in hulle poging om Gaza en waarskynlik die Wesbank te leeg van Palestyne.

Amerika in die Midde-Ooste: As Amerika voortgaan om met wapens, geld, en morele ondersteuning Israel by te staan in hulle massamoord van die inwoners van Gaza in ’n poging om die area voor te berei vir kolonisasie deur Israeli besetters, sal gewapende groepe in Palestina, Libanon, Sirië, Jemen, Irak, en dalk Egipte voortgaan om Amerikaanse troepe en basisse in die Midde Ooste aan te val. Dit sal Amerika in ’n moeilike situasie plaas. Meer Amerikaanse stewels op die grond gaan nie werk nie. Bom-veldtogte sal net werk op ’n skaal wat Iran nie betrek nie. As Iran betrokke raak, sal dit waarskynlik wees met missiele waarteen Amerika nie hulle bates in die streek kan beskerm nie. Amerika weet dit, wat beteken hulle weet hulle speel met vuur. Is hulle onnosel genoeg om hulle vingers in petrol te druk en dan in die vlamme te steek?

Rusland en Oekraïne: Nog ’n paar maande van duisende mans (en vrouens) wat desperaat druk teen die Russiese oormag, om ’n moreel korrupte regering in Kiëf aan bewind te hou, wat hulle bloedlustige politieke meesters in Washington in staat te stel om nog ’n paar miljard dollar te steel by die Amerikaanse belastingbetaler. Uiteindelik sal Rusland Kiëf beset, en onder andere ook Odessa inlyf by die Russiese Federasie – ter goedkeuring van die meerderheid van die bevolking in daai areas. Dit wat oorbly en steeds bekend sal staan as Oekraïne, se hoofstad sal skuif na Lvov.

Volgende Suid-Afrikaanse verkiesing: Suid-Afrika het ongelukkig nie ’n lewensvatbare alternatief vir die regerende African National Congress nie. Indien daar egter wel ’n koalisie ontstaan tussen opposisie partye en dit lyk asof daar ’n groter as 50% kans is dat hulle die ANC sal ontsetel, sal die regering skielik ontdek dat die Amerikaanse regering besig is om in te meng in die verkiesing ten einde die ANC te straf vir die saak wat die regering in Januarie 2024 gebring het teen Israel by die Internasionale Geregshof. Ek vermoed dit is wat die ANC-regering beweeg het om in die eerste plek die saak te maak teen Israel, siende dat dit algemeen bekend is dat die ANC regering self moreel korrup is. Die regering sal dan hierdie werklike of verbeelde inmenging gebruik om die verkiesing uit te stel, of as die verkiesing plaasvind en hulle aansienlik genoeg steun verloor, weier om die uitslae te aanvaar.

* * *

Wat betref die bestaanservaring van om ’n 52-jarige man te wees in die suide van Taiwan, getroud, twee katte – eintlik my vrou se troeteldiere want hulle aanvaar my bloot as ’n vierde dier in die huis … Bly ingeskakel.

______________________

Maandag 1 Januarie 2024

Ten spyte van halfhartige pogings om 2023 se Oujaarsaand meer opwindend te maak, was dit, soos die vorige jaar, ’n anti-klimaks.

Ons het afgegaan na die Love River, Kaohsiung se hoof waterweg wat eindig in die Seestraat van Taiwan. By die hoogs moderne musieksentrum by die seiljagklub het ’n paar verlore siele rond gesit en gestaan en gestaar na hulle fone. Anders as verlede jaar, was daar geen reuse skerm om ’n mens in te lig hoeveel sekondes jy oor het om wilde beloftes te maak, en te probeer verskonings uitdink hoekom jou beloftes 365 dae gelede nie heeltemal uitgewerk het nie.

Twintig minute voor die einde. Ek drink stadig aan my warm tee en eet ’n Portugese eiertertjie.

Vyftien minute oor. Tyd om vinnig te kyk wat aangaan op X/Twitter.

Nege minute. Nog ’n tertjie. Staan op en strek my bene. Resiteer weereens wat ek geformuleer het vir 2024.

Drie minute. Neem ’n paar foto’s.

“Hoe sal ek weet wanneer die countdown begin?” Vinnige Google search.

Paniek skop in: 32 sekondes voor die einde van die jaar. Twaalf sekondes. “Moet ek aftel?” Vier sekondes … Skermgreep …

Drietweeeennul …

“Wag! Ek was nie gereed nie! Niemand het afgetel nie! Waar’s die vuurwerke?!”

En net so, is een jaar verby en nog een het begin.

Omhels ’n bietjie. Stuur ’n paar boodskappe. Gooi die laaste tee in my keel af. Frommel die laaste tertkrummels in die papiertjie toe, en druk dit in my sak.

Terug na die bromponie. Terug werk toe.

’n Glorieryke, onvergeetlike jaar wag vir niemand nie.

Sondag 31 Desember 2023

Ek het nie hierdie jaar veel geskryf nie – minder as 2,000 woorde gepubliseer teenoor meer as 22,000 verlede jaar.

Een rede: Ek het gevoel dat ek gesê het wat ek wou sê.

Ek het in 2023 ’n paar gedagtes verwoord oor die lewe en die dood. Ten spyte daarvan dat die oorlog in Oekraïne steeds voortwoed, het ek nie veel bygevoeg tot wat ek verlede jaar gesê het nie. Daar was ook nie veel wat ek kon bylas oor my opinie oor die China-Taiwan vraagstuk nie. Ek was soos meeste mense geskok oor wat gebeur het in Israel op 7 Oktober, en het sedertdien met afgryse op sosiale media gevolg wat besig is om te gebeur in Gaza.

Ander nuus het gekom en gegaan.

Soos elke jaar, voorspel mense die einde van die wêreld in die nuwe jaar.

Soos elke jaar, sal hulle waarskynlik verkeerd wees.

Aan die ander van die spektrum voorspel sommige mense ’n goeie jaar – vir sommige mense.

Ekself is agnosties. En vol hoop.

Dalk sal dit blyk te wees ’n goeie tyd om dinge bymekaar te bring.