Hierdie blad bevat woorde wat begin met “A” tot en met woorde wat begin met “G”. Dit kom uit ’n projek getiteld, Sê dit beter, volume 1.
aangedaan – bewoë, ontroerd, getref; wanneer jy ’n sterk emosionele gevoel ondervind
anekdote – ’n kort interessante storie, staaltjie, of vertelling
apokrief – twyfelagtig, ongeloofwaardig, onseker, nie as eg bewys nie
argeloos – onskuldig – soos ’n kind; te goeder trou, verwag niks kwaads nie
beduidend – belangrik, aansienlik
bekrompe – kleingeestig, kleinsielig
betrag – beskou, bekyk, oorweeg
daeraad – dagbreek, môrelig, rooidag
desweë – daarom, dus, derhalwe
drogredenasie – ’n vals en bedrieglike argument, of vals en bedrieglike redenering
dweepsiek – sterk neiging om te dweep, om (veral religieus) fanaties te wees; om besiel te wees met blinde ywer vir iemand, of vir ’n saak; oordrewe gevoelens van bewondering vir iets of iemand
efemeries – kortstondig, vlugtig, tydelik, van korte duur
empiries – gegrond op proefneming en observasie eerder as teorie
eteries – vlugtig; iets wat gou verdamp of verslaan
eweneens – ook, soos
fiasko – volslae mislukking, totale nederlaag, debakel
gebelg(d) – gekrenk, nukkerig, kwaad wees (oor iets wat iemand jou aangedoen het)
gedoem – gevonnis, veroordeel; wat nie te redde is nie
geneë/geneentheid – om iemand gunstig gesind te wees; geneig tot iets, lus daarvoor
geradbraak – (veral oor taalgebruik) verknoeid, gebrekkig
gramskap – woede, toorn, ergernis, wrewel
grotendeels – hoofsaaklik, in ’n hoë mate
gul – oorvloedig, ruim, mildelik, rojaal; gaaf, vrygewig, gasvry, ruimhartig
A – G »» H – L »» M – P »» R – T »» U – Z
______________________