Etiket: jaareind

DINSDAG 29 DESEMBER 2015

Paul Eddington van Yes, Minister-faam het ’n paar dae voor sy dood in 1995 die volgende gesê: “A journalist once asked me what I would like my epitaph to be and I said I think I would like it to be ‘He did very little harm’. And that’s not easy. Most people seem to me to do a great deal of harm. If I could be remembered as having done very little, that would suit me.”

DONDERDAG 31 DESEMBER 2015

As jy op enige dag vir my vra wat ek die volgende dag wil doen, sal ek ’n hele paar dinge kan noem. Wat ek nie sal sê nie, is dat ek maar net gaan wakker word en gaan wag en kyk wat gebeur, want ek wil nie iets beplan en dan werk dit nie uit nie.

Selfde met die laaste dag van die “ou” jaar en die eerste dag van die “nuwe” jaar. Sommige mense reken jy moenie te veel planne hê nie, of doelwitte stel nie, of vaste datums resiteer nie. Ek reken: Ek is dankbaar dat ek nog hier is, en as ek môre ook nog hier is, gaan ek nie my tyd mors nie. Ek sal besig raak met dinge wat ek wil doen, en as dinge nie tussen Vrydag 1 Januarie 2016 en Saterdag 31 Desember 2016 uitwerk soos ek hoop nie, sal ek dit so aanvaar.

______________________

Ek is regtig bly dis die laaste dag van die jaar. Dit gee my ’n verskoning om vandag en môre by die huis te bly.

(Vir meer as dit sal ek ’n formele hoedjie moet opsit en allerhande konvensies moet eerbiedig. En ek sou dalk as ek nie ’n vaakheid, of verveling, oor my voel neerdaal het nie.)

Ten minste die helfte van 2014 was besonders lekker. Ek het baie gedoen. Ek gaan 2014 uit op ’n goeie punt. Ek betree derhalwe 2015 op ’n goeie punt.

Ek hoop ten minste die helfte van 2015 gaan net so goed, of selfs beter wees as 2014 … oftewel, ek gaan my uiterste doen om dit so te maak.

Hoop dis dieselfde vir almal.

____________________

MAANDAG 30 DESEMBER 2013

Daar is ’n paar dinge wat ek begin het om te realiseer hierdie jaar. Hierdie proses moet voortgaan in 2014.

In die lig van die hele die-mens-is-’n versameling-atome-wat-voortdurend-hernu-storie, die volgende advies: Dink dit, en word dit.

DINSDAG 31 DESEMBER 2013

Instink – of begeerte – wil mens altyd dwing om jouself op te psyche op hierdie laaste dag van nog ’n jaar. Jy verbeel jouself dinge gaan binnekort vinniger begin vorentoe beweeg. Drome gaan binne die volgende paar weke realiteit word. Teen einde Februarie … dan, teen einde Maart …

Een brokkie advies: Aanvaar die moontlikheid dat dit jou nog ’n paar maande kan vat om ’n paar dinge te bemeester, en om al die besluite te neem wat deel is van wat uiteindelik ’n suksesvolle onderneming sal wees.

* * *

Gewoonlik op hierdie tyd van die jaar (23:36) kan ek nie wag dat die formaliteite verby kan gaan sodat ek voort kan gaan met my werk nie. So is dit ook nou.

2011 was ’n goeie jaar.

2012 was ’n goeie jaar.

2013 was ook ’n goeie jaar – en ek sê dit nie net om nie die jaar se gevoelens seer te maak nie!

Ek gaan beslis die jaar beter uit as wat ek dit binne gegaan het. Ek het my familie gesien. Ek het nog van my skryfwerk gepubliseer. En ek het hard gewerk daaraan om meer geld te maak. Aan die ander kant het ek nie baie tyd gespandeer aan my Chinees nie. Ek het ook nie veel geoefen buiten my fietsryery nie. En ek het nie veel gewig verloor nie – hoewel ek ook nie juis gewig opgetel het nie. Oor die algemeen moet ek tog sê, ek is gelukkig met wat ek gedoen het in 2013.

* * *

Ralph Waldo Emerson het gesê: “Finish each day and be done with it. You have done what you could. Some blunders and absurdities no doubt crept in; forget them as soon as you can. Tomorrow is a new day; begin it well and serenely and with too high a spirit to be encumbered with your old nonsense.”

______________________

Ek was ietwat geskok gister toe ek herinner word daaraan dat ons vanaand na ’n Oujaarspaartie toe gaan, met die implikasie dat môre die begin van ’n nuwe jaar is.

As ek sê ek wil nie hê hierdie jaar moet eindig nie, bedoel ek nie dat ek wil vashou aan dit wat verby is nie. Wat ek wil hê, is om môre – die eerste dag van 2013 – op te staan, en om naatloos voort te gaan met alles wat ek hierdie jaar gedoen het.

Ek wil nie ophou en dan weer begin nie. Ek wil voortgaan.

* * *

Vandag is ook ’n goeie dag om waarde te put uit die advies van Mary Schmich: “Whatever you do, don’t congratulate yourself too much, or berate yourself either. Your choices are half chance. So are everybody else’s.”

Dit gesê, jy is steeds tot ’n groot mate self verantwoordelik vir die enorme hoeveelheid sukses en geluk wat jou kant toe kom in 2013. En siende dat dit so is, maak seker jy doen wat jy kan om dit te realiseer.

———–

Teks van die Mary Schmich artikel, “Advice, like youth, probably just wasted on the young” was gebruik deur Baz Luhrmann in sy 1999-snit, “Everybody’s Free (To Wear Sunscreen)”. Die oorspronklike artikel is op sy beurt soortgelyk aan die 1927-gedig deur Max Ehrmann (1872-1945), getitel “Desiderata”. ’n Kort uittreksel: “With all its shams, drudgery, and broken dreams, it is still a beautiful world. Be cheerful. Strive to be happy.”

______________________

Die laaste dag van die jaar is soos die laaste wakker uur van ’n dag: Sommige mense ly aan ligte skok en teleurstelling dat dit verby is, dat dit wat jy nie vandag gedoen kon kry nie, moet wag vir môre.

Oor ’n paar ure is 2011 verby.

Hierdie was ’n goeie jaar, ’n besonderse jaar. My en Natasja se verhouding was van die begin af van so ’n aard dat ons nie ’n dokument nodig gehad het om te weet ons hoort bymekaar nie. Nietemin, verlede maand het ons na amper sewe jaar amptelik en wettiglik trou aan mekaar gesweer. Op die werksfront het ek hoofsaaklik op twee kommersiële projekte gefokus. In Februarie het ek ook begin om weer die beste ure van my dag te spandeer aan my skryfprojekte – iets wat ’n so te sê daaglikse realiteit geword het. En laastens, ek het heelwat tyd gespandeer die afgelope twaalf maande by ’n tandarts genaamd Harmony, met die gelukkige resultaat dat ek uiteindelik weer behoorlik kan eet.

Vanuit die posisie waarin ek myself op hierdie oomblik bevind, as gevolg van wat ek gedoen het tussen Saterdag 1 Januarie en nou, Saterdag 31 Desember, lyk 2012 asof dit dalk net ook ’n goeie jaar mag wees.

’n Nota van Dinsdag 4 Januarie 2011 mag dalk gepas wees: “’n Jaar in ’n mens se lewe is soos ’n kind. Jy kan beplan, jy kan voorberei, en jy kan hoë verwagtinge koester. Maar uiteindelik moet die kind toegelaat word om sy eie gang te gaan, om sy eie karakter te ontwikkel. Jy kan, en moet, leiding gee, maar aan die einde sal jy moet vrede maak: Doen jou absolute bes, en vertrou vir die res.”

Mag 2012 ’n goeie jaar wees, vir myself, vir my beminde, en vir al ons vriende en familie. En mag dit ’n goeie jaar wees vir alle goeie mense op hierdie planeet wat elke dag hoop en stry vir ’n beter dag.

____________________