’n Betekenisvolle brokkie kennis

DINSDAG 8 OKTOBER 2024

Ek het in 1994 freneties begin notas maak. Dit was asof ek ’n roeping aangevoel het om te rapporteer oor my lewe. Die afgelope dertig jaar het ek aan en af gerapporteer, soms elke dag en soms net ’n paar verlore paragrawe in een kalenderjaar.

Die punt is steeds om te sê: Hier is ek. Dis hoe ek die lewe ervaar.

* * *

Dertig jaar gelede wou ek geld maak want ek wou doen wat ék wou doen. Ek wou nie gehad het mense moes bevele blaf en verwag ek moes spring nie. Ek wou geld gehad het om te kon reis en te kon studeer (seriously, ek was 23 jaar oud en ek wóú studeer).

Twintig jaar gelede was ek ernstig daaroor om my inkomste te verbeter want ek wou ’n beter lewe bewerkstellig vir myself, en die vir die jong vrou met wie ek later sou trou. Ek wou meer reis, en ek wou meer gereeld my familie in Suid-Afrika besoek.

Vandag wil ek my inkomste verbeter want ek wil my finansiële sekuriteit versterk, veral met die oog daarop dat ek binne dalk twee dekades nie meer lus gaan wees om te werk nie, of dalk nie meer alles kán doen wat ek wil doen nie.

Verskillende begeertes, maar dieselfde pad wat lei tot die vervulling daarvan. Een verskil is dat ek weet hoe twintig en dertig jaar onder my voetsole voel, en ek weet hoe dit deur my vingers glip. En ek weet twintig of dertig jaar van nou af – as ek so lank hou – is ek amptelik oud. Nie noodwendig afgeleef nie, maar definitief bejaard. Hierdie betekenisvolle brokkie kennis was nie deel van my bestaanservaring twintig of dertig jaar gelede nie.

______________________

Moontlikhede van die aard van ons realiteit (en wie’s in beheer)

VRYDAG 23 AUGUSTUS 2024

Een: Die wêreld het natuurlik ontstaan deur ontploffings en kosmiese uitbreiding en evolusie. Politieke leiers is mense wat deur ’n kombinasie van persoonlikheid, toeval, en sosiale druk posisies van mag bekom het. Meeste van hulle is korrup; sommige probeer hulle bes om hulle gemeenskappe te dien en op te hef. Dan sterf hulle of hulle word uitgestem of ontslaan, en iemand anders neem hulle plek. ’n Ander weergawe hiervan is dat die toutjies in Amerika getrek word deur ’n sameswering van Groot Olie, Intelligensie, en Wall Street (sien Mike Benz op X). ’n Mens kan sekerlik veronderstel dat elke land sy eie weergawe het van sulke groot en magtige belange wat agter die skerms besluite neem.

Twee: Die wêreld het natuurlik ontstaan deur ontploffings en kosmiese uitbreiding en evolusie. Politieke leiers is marionette van die Vatikaan, wat agter die skerms al die belangrike toutjies trek. Hoekom? Die Rooms Katolieke Kerk het Europa regeer vir amper ’n duisend jaar lank. Die algemene veronderstelling is dat hulle stadig maar seker mag en invloed verloor het oor die volgende vyf eeue. Hierdie veronderstelling is óf verkeerd, óf hulle het geslaag daarin om weer ondersteuners in posisies van mag te plaas.

Drie: Die wêreld het natuurlik ontstaan deur ontploffings en kosmiese uitbreiding en evolusie. Politieke leiers is marionette van ’n Joodse komplot om die wêreld te regeer tot hulle voordeel. Hoekom? Joodse komplot-leiers glo in die superioriteit van Jode, en glo dat dit God se wil is dat Jode die wêreld moet regeer.

Vier: Die wêreld het natuurlik ontstaan deur ontploffings en kosmiese uitbreiding en evolusie. Op ’n stadium is effektiewe beheer van die wêreld oorgeneem deur reptiel-wesens van die buitenste ruim wat demone aanbid. Politieke leiers is Satanistiese pedofiele wat marionette is van hierdie reptiel-wesens wat deur manipulasie die wêreld regeer tot hulle eie voordeel.

Vyf: Ons en die wêreld waarvan ons sintuiglik bewus is, is deel van ’n rekenaarsimulasie – wat ons ervaar as realiteit, is inderwaarheid ’n super-realistiese, gevorderde rekenaarsimulasie. Wat is die argument hiervoor? Op een of ander stadium sal die mensdom die tegnologiese vaardighede en hulpbronne ontwikkel om ’n kragtige rekenaarsimulasie te skep van hulle voorouers. Kans is goed dat hulle vele sulke simulasies sal skep. Kans is dat die gesimuleerde inwoners van hierdie wêrelde bewus sal wees van hulleself. Wat is dan die kans dat die persoon wat bewus is van homself deel is van die generasie wat die oorspronklike skeppers is van sulke simulasies, en nie een van moontlik duisende simulasies nie?

______________________

Hoe gaan aftrede lyk oor tien of vyftien jaar?

MAANDAG 17 JUNIE 2024

Die stille waarheid: Ek het gesê wat ek wou sê. Nou doen ek wat ek moet doen om te verseker dat ek ’n relatief gemaklike aftrede kan geniet oor ’n paar jaar.

DINSDAG 18 JUNIE 2024

Nou dat ons op die onderwerp is: Hoe gaan aftrede lyk oor tien of vyftien jaar?

Gaan ’n gemaklike maar nie luukse laer-middelklas lewe méér kos as nou of minder, relatief gesproke?

Gaan behoorlike gesondheidsorg duurder of goedkoper wees?

Hoe bekostigbaar gaan huishoudelike robots wees? Sekerlik sal dit goedkoper én meer bruikbaar word, soos die geval was met persoonlike rekenaars die afgelope dertig jaar.

Wat van voedselproduksie? Dit is reeds moontlik vir woonstelbewoners in die middestad om ’n wye verskeidenheid groente in hulle sitkamers te groei, of in ’n spaarkamer. Hoe noodsaaklik gaan onafhanklike voedselproduksie wees vir oorlewing in die stad in 2030, of 2035, of 2026?

Hoe duur sal dit wees om te reis? Selfbesturende taxi na die treinstasie waar jy met ’n hoëspoedtrein sal reis na jou bestemming – duurder as nou of meer bekostigbaar? Sal ’n persoon in sy of haar sestigs of sewentigs enigsins wíl reis na ander plekke met die gepaardgaande risiko as hulle by die huis kan bly en enige dorp, stad, berg of strand in die wêreld kan ervaar met virtuele tegnologie?

Met vrugte en groente skoon van chemikalieë, genoeg oefening, lae misdaad in hoë-sekuriteit gemeenskappe, goedkoop gesondheidsorg, sal jou gemiddelde Generasie X’er dalk langer leef oor die volgende paar dekades. Groot vraag: Hoeveel geld gaan jy nodig hê om hierdie aftrede te kan bekostig?

Nog iets: Hoe sal geld werk tien jaar van nou af? Papiergeld en muntstukke sal waarskynlik uitgefaseer word. Hoeveel gaan jou Bitcoin en ander kripto-geldeenhede werd wees in 2035? Gaan dit vervang word met digitale geldeenhede wat deur ’n Ministerie van Finansies of Sentrale Bank behartig gaan word. Hoeveel erg gaan hierdie instansies hê in politieke opinie – veral opinies krities van die regering wat betref buitelandse beleid, misdaadbekamping, immigrasie, en entstowwe?

Sekerlik verdien dit ’n langer bespreking, maar kan demokrasie werk in realiteit, of is demokrasie soos die ou gesegde sê, “Twee wolwe en ’n skaap wat besluit wat hulle vir aandete gaan hê”?

Gepraat van wolwe en ’n skaap, hoe gaan lewe op die self-regerende eiland van Taiwan lyk oor ’n dekade of so? Gaan Amerika ’n ander skaap vind om te offer vir sy bloedlus en gierigheid? Die Filippyne dalk? Suid-Korea? Japan? Hoe ver sal China gaan om dit duidelik te maak aan Imperiale Amerika dat indien Taiwan ’n vasaalstaat gaan wees, dit beslis nie een gaan wees van ’n brokkelende ryk in die weste nie?

Hoe fisiek gaan aftrede in jou sestigs of sewentigs oor ’n dekade wees? Gaan jou liggaam kunsmatig aan die lewe gehou word met buise en masjiene terwyl jou verstand op vakansie is, of die wêreld vol reis? Natuurlik sal die buise net aanhou om voedingswaarde in jou are te pomp terwyl jou krediet hou. Die oomblik as jou krediet nul bereik, vervaag jou uitsig van die strand, of van die Eiffeltoring, tot jy een laaste “bliep” hoor.

Wat van ’n mediese instansie wat jou bystaan om jou eie lewe te beëindig wanneer jy ’n sekere ouderdom bereik? Of wanneer jy een of ander siekte ontwikkel wat genees kan word, maar dit sal tyd en geld vereis. Of wanneer jou geld min raak. Hoe populêr gaan dit wees vir mense wat nie ’n gemaklike aftrede kan bekostig nie, of vir wie iets verkeerd gegaan het ’n paar jaar voor hulle sou aftree? Hoe normaal gaan dit wees tien jaar van nou af vir dokters en ander professionele mense wat werk met ouer mense om dit voor te stel as ’n “waardige” oplossing? (Sal mediese personeel ’n kommissie verdien vir hulle aanbevelings?)

Gaan dit ’n geval wees van mense wat geld het wat gaan leef tot die rype ouderdom van 120 of selfs langer, met vars gedrukte of ontwikkelde organe, nuwe tande, en allerhande ander mediese wonders in die plek van hulle ou onderdele, en mense wat teen 45 of 50 nie daarin geslaag het om finansiële sukses te bewerkstellig nie, of wat nie genoeg geërf het van die vorige generasie nie, wat aangemoedig sal word om staatsgesubsidieerde genadedood te ontvang?

______________________

Vier stories uit die sewentigs en ’n paar ander dekades

DINSDAG 28 MEI 2024

Die BBC se Kultuur-seksie het ’n artikel met ’n onderhoud wat ’n program van die maatskappy gevoer het in 1976 met onder andere die hoofsanger van die Sex Pistols, Johnny Rotten.

Rotten, wat sy bynaam gekry het oor sy vrot tande, het ordentlike mense in die tweede helfte van die sewentigerjare gevul met afsku, en vrees vir die toekoms.

Tog, wat het Rotten gedoen die oomblik toe hy genoeg kontant in sy sak gehad het? Het hy dit gespandeer op partytjies en vriende wat hom misbruik het vir geld en dwelms? Het hy vir ’n paar maande ’n hotelkamer gehuur en al sy geld op drank en vroue spandeer? Nee, hy’t vir hom ’n goeie woonstel gekoop in ’n goeie woonbuurt, waar hy homself vir ’n paar jare gevestig het met sy vrou. Hulle was gelukkig getroud vir meer as vier dekades, tot sy gesterf het na jare van lyding aan Alzheimer se siekte. Vir die laaste vyf jaar van haar lewe was Johnny Rotten haar voltydse versorger. Baie vrot van ou Johnny.

VRYDAG 31 MEI 2024

Europa, in die 1860’s. ’n Prinses bekend vir haar skoonheid is verloof aan die kroonprins van ’n naburige staat. Almal dink hulle is ’n mooi paartjie. Dan sterf die prins. Sy verloofde gaan terug na haar geboorteland. Sy’s ontroosbaar. Haar verloofde familie laat weet hulle het regtig van haar gehou, en wat is die kans dat sy dalk met haar oorlede verloofde se broer (wat mal verlief is op een van sy ma se diensmeisies) kan trou. Sy antwoord dat sy baie hartseer is en dat niks dit kan verander nie. Nietemin besoek die broer haar. Hulle huil saam. Dan raak hulle verloof. Almal dink hulle is ’n mooi paartjie. Sy gee geboorte aan vier seuns en ’n paar dogters. Sy en haar man betree die troon nadat terroriste haar skoonpa se been afblaas. Na ’n dekade word haar oudste seun koning. Sy is oortuig dat haar aangenome land hervorming nodig het om rewolusie af te weer. Min hervorming word egter deurgevoer. Twintig jaar later word haar oudste seun, die koning, haar skoondogter, en ses van haar kleinkinders vermoor in die kelderverdieping van ’n huis waarin hulle aangehou is deur rewolusionêre wat die regering omvergewerp het. Sy en haar dogters vlug suid. Haar suster, wat getroud was met ’n koning van ’n ander land, oortuig haar eie seun, nou koning van haar aangenome land, om ’n skip te stuur. Die groep van sewentien adellikes wat so gered word, sluit in haar een dogter wat aan boord gaan met vyf van haar seuns, ses honde, en ’n kanarie.

* * *

Ooskus van Amerika, Februarie 1978. ’n Katastrofiese sneeustorm tref mense op pad huis toe. Dit sneeu aaneen vir meer as dertig ure. Skole en universiteite en besighede sluit. Treine gaan staan. Duisende karre is vasgevang op die snelweg en ander paaie. Veertien mense sterf omdat hulle karre so toegesneeu is dat die uitlaatgasse nie kan ontsnap nie. Talle mense is vir dae lank sonder hitte, water, kos, en elektrisiteit. Opgehoopte sneeu word in die hawe gegooi om plek te maak vir nuwe sneeu. Talle huise stort ineen of word weggespoel die oseaan in. Een kind verdwyn gedurende die storm enkele meters van sy huis se voordeur af. Sy liggaam word eers drie weke later gevind.

* * *

Engeland en Ierland, 1970’s. ’n Vrou gebore in ’n ryk familie verkoop al haar aandele in die familie-besigheid, verkoop haar huis, en deel die kontant uit aan arm mense. Sy woon saam met haar minnaar in ’n werkersklasbuurt. Saam beroof hulle haar familie se herehuis. Later sluit sy aan by ’n terroriste-organisasie in Ierland. Sy gooi melkkanne met plofstof uit ’n helikopter uit. Sy neem deel aan nog ’n rooftog. Dié keer steel hulle ’n klomp skilderye by ’n ander ryk ou – onder andere die enigste Vermeer buite Buckingham-paleis in private hande. Die polisie kry die skilderye in die bagasiebak van ’n kar. In die tronk trou sy met ’n ander minnaar en gee geboorte aan sy kind. Weer op vrye voete maak sy kragtige missiele, met pakke koekies om die terugslag te absorbeer. Sy hou aan met stry en baklei tot sy dekades later sterf, sonder geld, woonagtig saam met ou nonne in ’n aftree-oord bestuur deur die Arm Diensknegte van die Moeder van God.

______________________