Etiket: politiek

Hoop vir ’n goeie en gelukkige lewe – selfs in Gaza

WOENSDAG 30 APRIL 2025

Doelwit: ’n Goeie en gelukkige lewe, nou. En ’n gemaklike aftrede en oudag later – indien ’n mens dit so ver maak.

Is dit nie waarvoor almal hoop nie?

“Nie mense in Gaza nie,” sal iemand sê. “Hulle hoop net vir vrede, en vir die bomme om te stop.”

Korrek, sal ek antwoord. Vir nou hoop hulle elke dag desperaat vir vrede en stilte, en vir kos en medisyne en ander voorrade om hulle te bereik. En om te kan begin om hulle huise en skole en hospitale en ander infrastruktuur te herbou.

Maar waarvoor sal hulle wens indien die psigoties-terroristiese Europese koloniale projek genaamd Israel uiteindelik verslaan word in hulle pogings om Palestyne uit te wis en hulle grond te steel? Waarvoor sal hulle hoop wanneer hulle huise en hospitale en skole en moskees en kerke herbou is?

Hulle sal heel waarskynlik hoop vir ’n goeie en gelukkige lewe, en ’n gemaklike aftrede en oudag, indien hulle lewens so ver strek.

Moontlikhede van die aard van ons realiteit (en wie’s in beheer)

VRYDAG 23 AUGUSTUS 2024

Een: Die wêreld het natuurlik ontstaan deur ontploffings en kosmiese uitbreiding en evolusie. Politieke leiers is mense wat deur ’n kombinasie van persoonlikheid, toeval, en sosiale druk posisies van mag bekom het. Meeste van hulle is korrup; sommige probeer hulle bes om hulle gemeenskappe te dien en op te hef. Dan sterf hulle of hulle word uitgestem of ontslaan, en iemand anders neem hulle plek. ’n Ander weergawe hiervan is dat die toutjies in Amerika getrek word deur ’n sameswering van Groot Olie, Intelligensie, en Wall Street (sien Mike Benz op X). ’n Mens kan sekerlik veronderstel dat elke land sy eie weergawe het van sulke groot en magtige belange wat agter die skerms besluite neem.

Twee: Die wêreld het natuurlik ontstaan deur ontploffings en kosmiese uitbreiding en evolusie. Politieke leiers is marionette van die Vatikaan, wat agter die skerms al die belangrike toutjies trek. Hoekom? Die Rooms Katolieke Kerk het Europa regeer vir amper ’n duisend jaar lank. Die algemene veronderstelling is dat hulle stadig maar seker mag en invloed verloor het oor die volgende vyf eeue. Hierdie veronderstelling is óf verkeerd, óf hulle het geslaag daarin om weer ondersteuners in posisies van mag te plaas.

Drie: Die wêreld het natuurlik ontstaan deur ontploffings en kosmiese uitbreiding en evolusie. Politieke leiers is marionette van ’n Joodse komplot om die wêreld te regeer tot hulle voordeel. Hoekom? Joodse komplot-leiers glo in die superioriteit van Jode, en glo dat dit God se wil is dat Jode die wêreld moet regeer.

Vier: Die wêreld het natuurlik ontstaan deur ontploffings en kosmiese uitbreiding en evolusie. Op ’n stadium is effektiewe beheer van die wêreld oorgeneem deur reptiel-wesens van die buitenste ruim wat demone aanbid. Politieke leiers is Satanistiese pedofiele wat marionette is van hierdie reptiel-wesens wat deur manipulasie die wêreld regeer tot hulle eie voordeel.

Vyf: Ons en die wêreld waarvan ons sintuiglik bewus is, is deel van ’n rekenaarsimulasie – wat ons ervaar as realiteit, is inderwaarheid ’n super-realistiese, gevorderde rekenaarsimulasie. Wat is die argument hiervoor? Op een of ander stadium sal die mensdom die tegnologiese vaardighede en hulpbronne ontwikkel om ’n kragtige rekenaarsimulasie te skep van hulle voorouers. Kans is goed dat hulle vele sulke simulasies sal skep. Kans is dat die gesimuleerde inwoners van hierdie wêrelde bewus sal wees van hulleself. Wat is dan die kans dat die persoon wat bewus is van homself deel is van die generasie wat die oorspronklike skeppers is van sulke simulasies, en nie een van moontlik duisende simulasies nie?

______________________

Opinie oor Israel sedert Oktober 2023

WOENSDAG 20 MAART 2024

My opinie oor Israel het verander sedert verlede Oktober.

Dit is nou duidelik dat ’n betekenisvolle persentasie van die Israeli bevolking, en waarskynlik die meerderheid van die politieke elite, vir dekades al ’n Finale Plan in gedagte het vir die Palestynse bevolking van die Bybelse Israel.

Die plan is om, indien moontlik, alle Palestyne te forseer om te vlug oor die grens na Jordanië, Sirië, Libanon, en Egipte. En Palestyne wat weier om die res van hulle lewens te slyt as vlugtelinge, sal eenvoudig voor die voet vermoor word – een vir een, man, vrou, kind en oumens, koelbloedig, of dosyne op ’n slag met bom-veldtogte. Om mense aan te moedig om te vlug, maak Israel seker dat hulle elke gebou of fasiliteit wat gebruik kan word vir opvoeding of mediese sorg of enige tipe gemeenskapsaktiwiteit stelselmatig vernietig.

En wanneer die areas nou onder beheer van die Palestyne leeggemaak is, en huise en skole en hospitale en universiteite en moskees tot rommel gereduseer is, sal Joodse immigrante van Amerika en elders in die Weste, saam met burgers van Israel intrek, en nuwe huise bou, en nuwe skole, en nuwe hospitale, en nuwe geboue om húlle godsdiens te beoefen.

Die Palestynse Probleem sal uiteindelik opgelos wees.

Mense sal Israeli’s vuil aankyk vir ’n paar jaar, maar – so reken ek, reken ’n betekenisvolle persentasie van die Israeli bevolking, en waarskynlik die meerderheid van die politieke elite – uiteindelik sal mense vergeet, en aan beweeg na ’n ander gruwelstorie in ’n ander deel van die wêreld.

Die droom sal werklikheid wees.

______________________

Hoe sake staan op Dinsdag 30 Januarie 2024?

DINSDAG 30 JANUARIE 2024

Vir nuwe lesers: Ek is 52 jaar en sewe maande oud. Woon al vir meer as 25 jaar in die suide van Taiwan, vir die laaste 15 jaar of so saam met my vrou, en vir die laaste dekade met twee katte. En so aan en so aan.

Israel en Gaza: As ’n mens waarneem wat Israel aan Gaza en die Palestyne gedoen het sedert 7 Oktober 2023, stel ek myself voor ’n gesprek tussen die Eerste Minister van Israel, Benjamin Netanyahu, en ’n raadgewer:

Netanyahu: “What should our response be to Hamas?”

Raadgewer: “We need to destroy Hamas, even if we destroy the entire territory of Gaza and wipe out every man, woman and child who live there.”

Netanyahu: “Wouldn’t that be considered genocide?”

Raadgewer: “I guess it would.”

Netanyahu: “Let’s go.”

Trump as volgende Amerikaanse president: Wat weet ek van Amerikaanse politiek, en ek is buitengewoon sleg met voorspellings, maar ek dink Trump gaan inderdaad die verkiesing wen in November 2024. Hoekom sal die Diep Staat en hulle duisende medewerkers in die politieke establishment, die media, die akademie, en die vermaaklikheidswêreld dit toelaat? Want Trump sal vir hulle gee wat hulle nodig het. Hy sal ’n stop sit aan die golwe van ongedokumenteerde immigrante wat oor die Amerikaanse grens vloei. Hulle sal hom kritiseer terwyl hy dit doen, ten spyte daarvan dat hulle sal weet hy los ’n probleem op wat húlle veroorsaak het. Hy sal ’n stop sit aan die buitensporighede van die sogenaamde Social Justice Left van die laaste dekade of so. Natuurlik sal hulle lippediens doen aan die ideologie terwyl hy probeer om dit terug in ’n bottel te druk. Hy sal ook ten minste ’n poging aanwend om met Poetin te onderhandel – waarvoor hulle hom ook sal kritiseer, wetende dat almal insluitende hulle troetelprojek Zelenski dit nodig het. Israel is nie ’n probleem nie, want Trump sal voortgaan om Israel te ondersteun in hulle poging om Gaza en waarskynlik die Wesbank te leeg van Palestyne.

Amerika in die Midde-Ooste: As Amerika voortgaan om met wapens, geld, en morele ondersteuning Israel by te staan in hulle massamoord van die inwoners van Gaza in ’n poging om die area voor te berei vir kolonisasie deur Israeli besetters, sal gewapende groepe in Palestina, Libanon, Sirië, Jemen, Irak, en dalk Egipte voortgaan om Amerikaanse troepe en basisse in die Midde Ooste aan te val. Dit sal Amerika in ’n moeilike situasie plaas. Meer Amerikaanse stewels op die grond gaan nie werk nie. Bom-veldtogte sal net werk op ’n skaal wat Iran nie betrek nie. As Iran betrokke raak, sal dit waarskynlik wees met missiele waarteen Amerika nie hulle bates in die streek kan beskerm nie. Amerika weet dit, wat beteken hulle weet hulle speel met vuur. Is hulle onnosel genoeg om hulle vingers in petrol te druk en dan in die vlamme te steek?

Rusland en Oekraïne: Nog ’n paar maande van duisende mans (en vrouens) wat desperaat druk teen die Russiese oormag, om ’n moreel korrupte regering in Kiëf aan bewind te hou, wat hulle bloedlustige politieke meesters in Washington in staat te stel om nog ’n paar miljard dollar te steel by die Amerikaanse belastingbetaler. Uiteindelik sal Rusland Kiëf beset, en onder andere ook Odessa inlyf by die Russiese Federasie – ter goedkeuring van die meerderheid van die bevolking in daai areas. Dit wat oorbly en steeds bekend sal staan as Oekraïne, se hoofstad sal skuif na Lvov.

Volgende Suid-Afrikaanse verkiesing: Suid-Afrika het ongelukkig nie ’n lewensvatbare alternatief vir die regerende African National Congress nie. Indien daar egter wel ’n koalisie ontstaan tussen opposisie partye en dit lyk asof daar ’n groter as 50% kans is dat hulle die ANC sal ontsetel, sal die regering skielik ontdek dat die Amerikaanse regering besig is om in te meng in die verkiesing ten einde die ANC te straf vir die saak wat die regering in Januarie 2024 gebring het teen Israel by die Internasionale Geregshof. Ek vermoed dit is wat die ANC-regering beweeg het om in die eerste plek die saak te maak teen Israel, siende dat dit algemeen bekend is dat die ANC regering self moreel korrup is. Die regering sal dan hierdie werklike of verbeelde inmenging gebruik om die verkiesing uit te stel, of as die verkiesing plaasvind en hulle aansienlik genoeg steun verloor, weier om die uitslae te aanvaar.

* * *

Wat betref die bestaanservaring van om ’n 52-jarige man te wees in die suide van Taiwan, getroud, twee katte – eintlik my vrou se troeteldiere want hulle aanvaar my bloot as ’n vierde dier in die huis … Bly ingeskakel.

______________________

Twee gedagtes oor China en Taiwan

DINSDAG 27 DESEMBER 2022

Ek hoop dat Taiwan sal voortgaan om te wees vreedsaam, welvarend en demokraties. Ek hoop ook dat China sal voortgaan om te wees vreedsaam en welvarend, indien nie demokraties nie.

Ek glo Taiwan moet amptelik erken word vir wat dit die afgelope meer as sewe dekades al is: ’n onafhanklike land. China het nietemin aansprake op Taiwan wat aangespreek moet word. Dit is my oortuiging dat hierdie ’n saak is wat tussen Taiwan en China uitgewerk moet word. Die Verenigde State het in 1945 ’n wettige aanspraak gehad op ’n sitplek aan die China-Taiwan-tafel, en miskien vir ’n geruime tyd daarna, maar daardie tyd is verby.

Die onafhanklikheid van Taiwan of hereniging met China is iets wat tussen hierdie twee lande uitgewerk moet word sonder inmenging van enige iemand anders.

DONDERDAG 29 DESEMBER 2022

Ek dink nie China gaan Taiwan aanval binne die volgende paar jare nie – mits die internasionale situasie min of meer bly soos dit nou is.

Drie redes: 1) ’n Chinese inval is die situasie wat die Amerikaanse Diep Staat en wapenvervaardigers die meeste begeer. Dit sal die Amerikaanse regering se geopolitieke doelwitte dien, en miljarde dollars wins verseker vir die wapenvervaardigers. Die Russiese militêre operasie in die Oekraïne het ook die Amerikaanse Diep Staat se doelwitte gedien, en steeds het Rusland voortgegaan. Hoekom sal China nie dieselfde doen nie? Een rede is omdat Taiwan nie etnies Chinese mense naby die Chinese vasteland maar binne die grense van Taiwan bombardeer en hulle huise verwoes nie. En ten minste vir nou bou NAVO nie basisse in Taiwan nie, en is nie besig met die opleiding van Taiwannese magte vir ’n konflik met China nie [teen Desember 2023 is ’n mens nie meer seker of hierdie stelling korrek is nie]. 2) ’n Chinese inval sal lei tot ernstige steurnisse vir die Chinese ekonomie en burgerlike samelewing. 3) ’n Militêre inval is nie China se enigste opsie om beheer oor Taiwan te kry nie. Omsingeling, blokkasies, en ekonomiese sanksies kan moontlik voldoende druk plaas op die Taiwannese regering om te minste Chinese terme vir onderhandeling te oorweeg.

______________________