PERSOONLIKE AGENDA bestaan uit drie boeke:
– Boek een, ’n versameling notas, korrespondensie en ander stukke, strek vanaf Januarie 1999 tot en met Mei 2003.
– Boek twee is geskryf tussen Mei en Desember 2003. In kontras met die eerste boek, is die materiaal in hierdie deel geskryf met die akute bewustheid dat ek besig was om te werk aan ’n projek.
– Die laaste stopteken sou nie ingepons kon word sonder dat ek tevrede was dat ek, vir eers, genoeg gesê het nie. Boek drie is geskryf in Januarie en Februarie 2004.
My aanvanklike werkstitel vir die projek was eenvoudig: “Brand se Boek”. Teen die tyd wat ek die eerste uitdruk gemaak het van wat nou BOEK EEN is, het die titel verander na, “Oor aartappelslaai en ander belangrike sake” (ek het selfs ’n opstel geskryf oor my gunsteling kantgereg).
Nadat ek die tweede naskrif tot die eerste boek afgehandel het, het die idee van die “persoonlike agenda” homself aan my voorgedoen. Ek het gehou van die eerlike aard daarvan. Die frase word gereeld gebruik in skinderpraatjies, om ander te waarsku dat die betrokke individu ’n “agenda” het, en dat hierdie soms geheimsinnige sake sy of haar eerste prioriteit is. Dit was vir my belangrik om nie te wag tot iemand anders ’n lig daarop werp nie, my eie agenda as’t ware vir my verduidelik nie. Ek wou dit van die voorblad af bekend maak: Hierdie materiaal beskryf tot ’n groot mate ’n persoonlike agenda.
Soos hierdie tipe dinge natuurlik gereeld uitwerk, het die proses om die besonderhede van hierdie agenda te ontdek en dit te verwoord, temas aangeraak wat veel verder strek as net my eie soms onbeduidende bestaan.
(28 Julie 2004)
______________________
Brand Smit wou nooit ’n blogger wees nie
Sondag 28 Augustus 2011
Ek was al negatief oor die idee van “blogging” vandat ek die eerste keer gelees het daarvan in ’n koerant in 2004.
“Mense skryf oor hulle lewens en publiseer dit op die internet vir almal om te lees?” het ek gedink, terwyl ek vertroostend oor my notaboek gestreel het. “Wat skryf hulle nogal wat ander mense interessant sal vind?”
Siende dat ek neuroties daaroor was om deel te wees van enige groep, of gesien te word as dat ek dalk net miskien een of ander populêre tendens volg, het ek gereken: “Ek – ’n blogger? Nooit.”
Vroeg 2006 ontdek ek toe hoe om ’n domeinnaam te registreer, en BRANDSMIT.NET maak sy verskyning. Ek het weer gedink aan die idee van ’n blog, maar die outomatiese datering van inhoud – die dag wat jy die inhoud publiseer op jou blog word outomaties aangedui as die dag wat die inhoud ontstaan het – was ’n groot probleem. Daar was geen kans dat ek gelukkig daarmee sou wees dat ’n essay wat ek geskryf het in November 1999, skielik sou verskyn as dat ek dit geskryf het in Maart 2006 nie.
Die moontlikheid dat die datum handmatig verstel kan word, het eers ’n paar jaar later tot my deurgedring. Die publikasie van al die materiaal van my Persoonlike Agenda-projek op hierdie platform is die resultaat.
______________________