MAANDAG 1 MEI 2006
Elke mens het ’n keuse: wees ’n vernietiger van hoop, waardigheid en van lewe self, of wees ’n skepper van hoop, waardigheid en lewe – of wees iemand wat ʼn omgewing skep waar hierdie goeie dinge kan wortelskiet en ontwikkel, of iemand wat hierdie goeie dinge beskerm.
DINSDAG 9 MEI 2006
By verstek is die wêreld ’n koue, donker plek. Ons maak dit beter, maar ’n beter wêreld sal dit nooit by verstek wees nie. Dit sal altyd ’n stryd wees.
VRYDAG 12 MEI 2006
Ek het ʼn besonders goed ontwikkelde bewussyn van nood en dreigende gevaar (tien jaar gelede het ek dit my “noodtoestand” genoem). Hierdie skynbaar ewigdurende toestand gaan oor drie dinge: gesondheid – die feit dat ek rook; skuld – die feit dat ek nog steeds afbetaal aan my studieskuld; en inkomste – wat altyd op broekskeurvlak is.
VRYDAG 26 MEI 2006
Ek voel verplig om ’n vinnige update te maak. Ten spyte van die feit dat ek redelik broke is op die oomblik (NT$4 900 tot ek weer geld kry – oor twaalf dae, en dan ook maar net NT$3 500 vir veertien dae), is ek gelukkig – iets wat my terselfdertyd irriteer en vermaak.
Weereens het ek besef dat naas tyd spandeer met belangrike mense in my lewe, daar niks is wat my vul met soveel ekstase as om iets te produseer uit die talente wat ek ontvang het, die vaardighede wat ek ontwikkel het, en die kennis wat ek opgedoen het oor die jare nie.
______________________