DINSDAG 1 APRIL 2008
Ek moet dit eenvoudig aanvaar: Iets is nie reg met my ambisie om ’n suksesvolle bemarker te word nie. Na twee jaar ken ek meeste van die truuks, skuiwergate, “geheime” tegnieke, stelsels, stappe, tendense, ensovoorts, maar ek beweeg nie ʼn sentimeter vorentoe nie!
Ek wil die geld hê, dis verseker, en die hemel alleen weet ek het al genoeg materiaal bymekaargemaak om te weet wat ek moet doen.
Ek het baie geskryf voor ek begin het met hierdie bemarking besigheid, oor ’n klomp verskillende onderwerpe. Ek word betaal om met Taiwannese volwassenes gesprekke te voer, so kommunikasie behoort nie ’n probleem te wees nie. En ek het geleer hoe om domeinname te registreer en webwerwe te bou.
Waar lê die probleem dan met bemarking?
Skryf dertig artikels per week oor wat ook al die nuutste gier is; vul ’n dosyn blogs met dieselfde vervelige inhoud wat verskyn op dosyne ander blogs; skryf e-boeke oor onderwerpe waaroor jy nie veel hoef te weet nie want dis so maklik om dit te “fake”; boekmerk jou eie artikels onder skuilname om soekenjins te probeer fnuik om jou inhoud vinniger in hulle resultate te vertoon.
As ander mense goeie kwaliteit teks en ander materiaal produseer, kan ek dit nog oorweeg om sekere tipes projekte te administreer. Maar ek sal vir ewig vashaak op blokkie nommer nul as ek myself gaan dwing om iets te doen waaraan ek myself nooit sal kan toewy nie.
______________________