Die winsgewende periode 2006 tot en met die begin van 2011

DONDERDAG 8 SEPTEMBER 2016

Sedert 2011 al dink ek aan die jare 2006 tot en met die begin van 2011 aan ’n periode van verlies. Wat presies het ek verloor? Tyd, het ek nog die heeltyd gereken – want ek het soveel daarvan gemors om te probeer geld maak op allerhande maniere.

Hier is ’n meer positiewe siening van daai periode. Ek het geleer hoe om my skryfwerk te publiseer – insluitende formattering van manuskripte om gedrukte kopieë te kan maak, die skepping en formattering van elektroniese boeke, die opstel van ’n WordPress webwerf, basiese webontwerp, bemarking; ek het geleer van sportweddenskappe en pryshandel op sportmarkte, en ek het begin leer om geld te maak op die finansiële markte.

En, dames en here, binnekort sal ek kan sê dat die periode 2006 tot en met die begin van 2011 ook opgelewer het ’n projek bestaande uit meer as 70 stukke oor onder andere die lang en moeilike proses om te probeer geld maak sonder om vir iemand anders te werk – wat die materiaal heelwat anders maak as die materiaal wat dit voorafgegaan het, want dit gaan oor foute maak, op jou gesig val, jouself in die verleentheid stel, misluk keer op keer op keer … en aan die einde besluit jy om meer tyd te spandeer aan dinge wat jou gelukkig maak.

______________________