Waarin ek glo, en ’n paar ander punte

DONDERDAG 14 APRIL 2016

1. Dit is moeilik om te sê waarin ek glo.

2. Dit is ook moeilik vir my om te commit tot iets, want ek moet 100% glo daaraan (sien punt 1), en ek sal deurentyd toewyding daaraan aan myself moet verkoop.

3. Ek dink soms as mens dink aan ’n onderwerp, of jy kry ’n idee vir ’n boek, dat daar waarskynlik reeds ’n boek daaroor geskryf is. Mense het 50 jaar gelede ook so gedink, en natuurlik was dit nie waar nie, maar deesdae met Facebook en YouTube en Medium en Reddit en Digg emails met hoogtepunte van oral oor die internet is dit moeilik om te glo as jy ’n idee het vir ’n boek, dat niemand anders, in die hele wye wêreld, nog daaraan gedink het om so ’n boek te skryf nie. En dalk dink jy aan iets wat redelik uniek is, dan sien ’n ander skrywer of uitgewer met meer hulpbronne dit en dink hulle gaan iets soortgelyk doen, net beter, of interessanter, of snaakser. Wat ek wel wens ek meer kan sien van ander mense maar nog min ontdek het, is kosmiese verslag-tipe skryfwerk: ek is bewus daarvan dat ek bestaan; ek het leer lees en skryf; ek het identiteit ontwikkel; ek oorleef (hoe?); ek funksioneer (hoe?); ek skryf wat ek dink en hoe ek voel en hoe ek dinge ervaar. Indien ek so ’n langtermyn skryfprojek van iemand anders ontdek, sal ek nie my eie literêre pogings vergelyk met daai persoon s’n nie. Ek sal verheug wees. Ek sal gretig lees wat die persoon dink, hoe hy of sy voel, en hoe hy of sy die lewe ervaar.

4. Tien jaar gelede of so het ek geglo ek kan iets skryf, en iemand sal dit lees en dink, “Hierdie ou is reg. Dit moet eintlik so wees. Ek sal van nou af anders optree.”

5. Op Dinsdag 2 Junie 2015 om 17:26 skryf ek die volgende: [Dalk verskil my lewe nie veel] van die volgende ou s’n nie, en ek mors my tyd met my sogenaamde skryfwerk. Aan die ander kant glo ek daar is ’n skraal moontlikheid dat ek my volwasse lewe sover op ’n manier geleef het wat aan my ’n unieke beskouing gee van die mens se bestaan, en die lewens wat ons leef, en dat ’n kombinasie van persoonlikheid en tersiêre opleiding dit moontlik maak dat ek iets skryf wat iemand anders sal laat sê, “Ek hou van die bewoording hiervan. Dis nie regtig iets waaraan ek self nog nooit gedink het nie, maar die manier hoe die ou daaroor praat, maak dit makliker vir my om my eie gedagtes agtermekaar te kry.”

6. Op Vrydag 31 Julie 2015 om 10:06 het ek die drom laat rol vir ’n belangrike insig: Mens sê graag, “Maar iemand anders het dit klaar gesê,” of “Iemand anders doen klaar dit.” Feit is, nie almal het gehoor toe daai ander iemand gesê het wat hulle ook al gesê het nie, of hulle het nog nie daai movie gesien nie, of daai boek gelees nie. En selfs mense wat gehoor het wat daai man of vrou gesê het, of wat ’n sekere movie gesien het, of ’n sekere boek gelees het, het al vergeet van die liggies wat aangekom het in hul koppe! Almal vergeet dinge! Dit, aan die einde van die dag, is hoekom belangrike dinge herhaal moet word.

7. Op Donderdag 28 Januarie 2016 om 13:26 het ek geskryf: Dalk is die beste roman wat ooit geskryf sal word in enige taal, reeds geskryf. Maar steeds moet ons aanhou om te skryf. Dalk is die mees vrygewige mens wat ooit sal leef, dekades of eeue al dood. Maar steeds moet ons aanhou om vrygewig te wees.

MAANDAG 18 APRIL 2016

Ek dink nou al ’n geruime tyd aan hierdie ding dat ek nie werklik weet waarin ek glo nie.

Tref dit my vanmiddag soos ’n bliksemstraal: ek glo in bome.

Dink daaraan: bome is mooi; dit voorsien beskutting aan mens en dier en voël; bome voorsien voedsel aan mens en dier en voël, en insek; bome huisves ekologiese sisteme met sommige kreature wat hul hele lewensiklus in die boom uitleef; bome maak besoedelde lug skoon en maak dit derhalwe makliker vir mense om asem te haal; bome voorsien hout vir huise en hutte en ander skuilings, en vir meubels; bome voorsien hout vir warmte; bome voorsien papier vir boeke; ’n mens kan ’n aktivis vir die saak van bome word – om die waarheid te sê wy vele mense reeds hul lewens toe aan hierdie saak; bome kan vir honderde jare aanhou groei; en laastens maar nie die minste nie, vind jy jouself skielik een dag dat jy nakend buite rondwandel, kan jy eenvoudig oorstap na die naaste boom, sagkens ’n takkie vol blare afbreek, en jou gesig daarmee bedek.

______________________