Enkele waarhede – Vrydag 13 Maart 2015

Meeste ondernemings wat aangepak word, misluk.

Meeste beleggings wat gemaak word, betaal nooit ’n dividend nie.

Meeste boeke wat geskryf word, word deur baie min mense gelees.

Meeste websites word weinig besoek.

Meeste nuwe musiek word deur min mense gehoor.

Optimisme en geloof stu jou soms voort, en soms is dit jou ondergang.

Dit moet ook genoem word dat indien jy een onderneming aangepak het en dis suksesvol, is die waarskynlikheid beter dat jou volgende onderneming ook suksesvol sal wees.

As jy een belegging gemaak het wat wins oplewer, is daar ’n goeie kans dat jy hierdie sukses sal herhaal in jou volgende belegging.

As jy een boek geskryf het wat gelees word deur ten minste ’n paar honderd mense, is die waarskynlikheid relatief goed dat jou volgende boek ook deur ten minste ’n paar honderd mense gelees sal word.

As jy een website ontwikkel wat gereeld besoekers kry, is die kans relatief goed dat jou volgende website ook besoek sal word.

As jy ’n album uitreik met jou eie musiek en ’n paar duisend mense luister daarna of koop dit, is die kans relatief goed dat hierdie mense ook na jou volgende album of song sal luister, en dalk vir ander mense sal vertel daarvan.

Sukses, soos die ou spreekwoord sê, verwek immers meer sukses, en as jy min het van enige iets, is die kans goed dat jy in die toekoms nog minder sal hê.

______________________